പത്തിന്റെ പെരുക്കത്തില്‍ വിവാഹം കഴിച്ചവരും ശുഭകാര്യങ്ങള്‍ ചെയ്‌തവരും എന്തിനേറെ സിസേറിയനിലൂടെ കുട്ടികയെ പുറത്തെടുത്തവര്‍ വരെ കണ്ടേക്കും. എന്നാല്‍ പത്തിന്റെ ഈ അപൂര്‍വ ഒത്തുചേരില്‍ ഭൂമിയിലേക്ക്‌ ദൈവഹിതത്തോടെ എത്തിയത്‌ ആരാകും? അതു നിയാമ ബോണ്ട്‌ എന്ന കൊച്ചു മാലാഖ തന്നെയാകും. 2010-ാം വര്‍ഷത്തെ 10 മാസത്തിലെ പത്താം തീയതിയില്‍ പത്തുമണിയും പത്തു മിനിറ്റും പത്തു സെക്കന്‍ഡും കഴിഞ്ഞപ്പോള്‍ അമ്മയുടെ ഉദരത്തില്‍നിന്നു ഭൂമിയിലേക്ക്‌ എത്തിയവള്‍.
പറഞ്ഞിരുന്ന ഡേറ്റിനും എട്ടാഴ്‌ചയ്‌ക്കു മുന്‍പാണ്‌ നിയാമയുടെ വരവ്‌. കുട്ടിയുടെ ജനന സമയം ആശുപത്രിയിലെ ഡിജിറ്റല്‍ ക്ലോക്കില്‍ കൃത്യമായി രേഖപ്പെടുത്തുകയും ചെയ്‌തു. വെസ്‌റ്റ് മിഡ്‌ലാന്‍ഡ്‌സിലെ ഗുഡ്‌ ഹോപ്‌ ഹോസ്‌പിറ്റലിലായിരുന്നു നിയാമയുടെ ജനനം. നിയാമയും അമ്മ കീലി ഹിയാര്‍നിയും ആശുപത്രിയില്‍ സുഖമായിരിക്കുന്നു. മകളുടെ ജനനസമയം അറിഞ്ഞ്‌ ആദ്യം ആശ്‌ചര്യപ്പെട്ട അമ്മ പിന്നീട്‌ ആഹ്‌ളാദത്താല്‍ വീര്‍പ്പുമുട്ടിയതായി അധികൃതര്‍ പറയുന്നു.
പബ്‌ വെയിട്രസായി ജോലി നോക്കുകയാണ്‌ ഹിയാര്‍നി. 22 വയസുകാരനായ ഡീന്‍ ബോണ്ടാണ്‌ ഈ സമയക്കുരുന്നിന്റെ അമ്മ. മകള്‍ പിറക്കുമ്പോള്‍ ആശുപത്രിയില്‍ ഇല്ലാതിരുന്ന അച്‌ഛന്‍ വിവരം അറിഞ്ഞ്‌ എത്തുമ്പോഴത്തേക്ക്‌ എല്ലാം കഴിഞ്ഞിരുന്നു. കോളജില്‍ മേസ്‌തിരിയാകാന്‍ പഠിക്കുകയാണ്‌ ബോണ്ട്‌. മാസം തികയാതെയാണ്‌ കുഞ്ഞ്‌ പിറന്നതിനാല്‍ നവംബറോടു കൂടിമാത്രമേ അമ്മയേയും കുഞ്ഞിനെയും ആശുപത്രിയില്‍നിന്ന്‌ ഡിസ്‌ചാര്‍ജ്‌ ചെയ്യുകയുള്ളൂ. നൂറ്റാണ്ടില്‍ ഒരിക്കല്‍ മാത്രമാണ്‌ ഇത്തരമൊരു അപൂര്‍വ വേള പിറക്കുകയുള്ളൂ എന്നതിനാല്‍ കുഞ്ഞിനെ നൂറ്റാണ്ടിന്റെ ശിശു എന്നു വിളിച്ചാലും അത്ഭുതമില്ല.
